الفيلم الأمريكي والفيلم المصري

وانا صغيره كان بيجيلي فتره كدا بتفرج على افلام اجنبي و اللي هي كانت بتشدني ألا وهي " أفلام الرعب" بس بعد ما بتفرج عليه واتفرج على فيلم مصري بحس بقرف ودا كان بالنسبه لطفلة كانت بتكون مشدودة لفيلم من اوله لآخره وبعدها اتفرجت على فيلم مش شاددها بأي حال من الأحوال ...ولما كبرت وطلعت شانل تو اتفرجت على افلام كتير جدا اجنبيه والغريبه إن الفيلم الأجنبي الحلو تعرفه من اول مشهد فلو شدك هيفضل شدكـ لآخر الفيلم ....الحقيقه إحنا في مصر بنفتقر للقصة الحلوة والمحورية اللي بتمسك الفيلم والدراما الحلوة ..أكتر ما احنا بنفتقر لإخراج أو إنتاج أو ممثل حلو ..وهاخد فيلم

You 've Got Mail

على سبيل المثال .. الفيلم دا انا مش عشقته من شويه .. انا مش عشقته علشان العسل ميج راين ولا اللي يجنن توم هانكس .. أنا عشقته علشان دا فيلم بيحتوي على كذا فيلم جواه بيحتوي على 3 قصص يتعمل منهم أفلام ناجحه دراميه ..أولا قصة إن إتنين بيبعتوا ميلز لبعض ومش عارفين اي حاجه على بعض ويحبوا بعض وبيكونوا في الحقيقه منافسين لبعض ومش طايقين بعض" كم مره ذكرت بعض في هذا السطر :ي "...وثانياً قصة علاقه الأم ببنتها وقد ايه خلت بنتها تحب المكتبة بتاعتها وتحزن على فراقها وعلى اضطرارها لقفل المكتبه " دي فعلا إتعملت فيلم فرنسي ناسيه اسمه " ...قصه اتنين كانوا بيكرهوا بعض واتحول الكره لحب ..وممكن يكون في قصص تانيه انا مش لاحظتها .. عارفين القصص اللي في الفيلم دا بتخليك تسرح من أول الفيلم لآخره وتقعد تفكر في كل لقطة شفتها ...وتخليق تقعد بعد ما الفيلم يخلص تراجع الفيلم وتتمنى تشوفه تاني ...يااه بجد انا لما بكون بتفرج على فيلم من النوعيه دي مش بخلي حد يكلمني اثناء الفيلم ولا بعد الفيلم

وغير بقى قصة الفيلم الجميلة .. السيناريوا الرائع .. أثناء اي فيلم حلو اجنبي لازم تلاقي البطل او البطله قال جمله تخليك حافظها من جمالها والحقيقه كام مره اتعملت الحركه دي في افلام مصريه زي مثلا فيل احلام عمرنا لما مصطفى شعبان قال جمله شهيره " محدش بنجرح اوي الا لما بيحب اووي " يالهوي على اللي عملته الجمله انفجار ناس كتير كتبتها نك نيم واللي عاملها اسم بلوتوث واللي داخل بيها الشات .. شفتوا قد ايه وقع الكلام ممكن يخليك تحب فيلم مش قد اد كدا ... لازم اي حد يكتب السيناريوا يقدر وقع الكلام على المشاهد

والحقيقه في الفيلم ميج راين بتقول في آخر الفيلم جمله حلوة موت " أنا كنت بحلم انه يكون انت " يالهوي ولا هو لما هي بتكون عايزة تشتمه ويروح حاطط ايه على بقها ويقول لها "متقوليش كلام ممكن تندمي عليه كمان كام سنه " مش ممكن

والممثلين بقى مشكله كبرى ...نفسي ألاقي ممثل بيمثل بالعين .. مفيش بجد مفيش لا تقولي هاني سلامه ولا احمد عز ولا السقا ولا اي حد تاني ..يعني انا مره شفت فيلم البطل مش بيتكلم في الفيلم كله غير ب 20 جمله والباقي كله ساكت وبيعبر بعينيه ... أد إيه الفيلم دا أثر فيا بالرغم ان قصته مكنتش جامده اوي قد ما كانت عنيه عميقة ووصلتلي احساسه

نفسي ألاقي فيلم مصري بيحتوي على كل دا

يا ترى ممكن ألاقي !! اتمنى بجد ان الاقي عمق في اي فيلم عربي اي كانت جنسيته لان العمق بياخدك جوه الفيلم

واقتباساً من احمد رزق في فيلم التوربيني" تحس أنك قاعد في حضنن الممثلين"!.؟