الغربه في الوطن

بقالي كام يوم بحس ان في حرامي في البيت او ان في حد ماشي في الشقه ...مش عارفه افسر ايه اللي بيخليني اشعر الشعور دا وبهدي نفسي باني بحط سكينه على الكوميدينو علشان اطمن ...حاسه بخوف شعور نادر ما كنت اعرفه وسط اهلي ...كل ما افتكر نفسي وانا معاهم بحس اني كنت اكثر ضحكا اكثر هدوئا واكثر طيبه واكثر حاجات كتير تانيه ...وكل ما اقارن صورتي هناك معاهم بصورتي هنا ...اشوف نور في الصورة الاولى ونور خافت في الصورة التانيه ...مقدرش انكر ان قعدتي لوحدي خلتني اكثر استيعابا للحياة وفكرت في مواضيع كتير وشفت الحياة بمنظور تاني وعلى اد منا مستفيدة بوحدتي على اد ما عندي تشاجرات داخليه ...تعرفوا حاجه ...اكتشفت انك كل ما تبعد عن حاجه بيكون عندك حنين ليها كل ما تقرب منها تحس اد ايه انك كنت غبي لما فكرت ترجع لها ...الشعور دا بيمثل شعوري ناحية مصر ...كنت بموت من الفرح في اليوم اللي هسافر فيه مصر والبس احلى هدومي علشان مصر تشوف بنتها بأحلى صورة وكانت مصر بالنسبالي ريحه حلوة و بحر ونيل وناس طيبه وحاجات كتير بداخلي ...دلوقتي بالنسبالي غيمه سودة ومايه مش نضيفه وبحر فيه طحالب وهواء نصه دخان ...أما بقى بالنسبه لأهلي فكل ما حد يعرف ان انا واختى قاعدين في مصر لوحدنا مش بسمع غير كلمه واحدة " يا بختكـ "...وبرد بسكوتي لأن الأهل دول حاجه محدش يقدر يحسها غير اللي بعاد عنهم ..الأهل دول الأمان والأطمئنان والصدر الحنين والحمايه ...الأهل دول يخلوك نايم مطمن مش خايف من حرامي ممكن يدخل بيت أو نايم وجنبك سكينه من خوفك من الناس اللي حواليكـ .. الأهل دول محدش يعرف قيمتهم غير اللي بعد عنهم ...أو إللي مش لاقيهم أصلا

وممكن اطلع من تجربه السنه دي بحاجه واحدة:

مهما كان الناس حواليك والدنيا حلوة في عنيكـ ..مش هتلاقي في زنقتك غير أهلك يطبطبوا عليكـ