بأمر من ....: تعليم المبدأ أسهل من تعلمه

من خلال رحلتي القصيره تعلمت أن الإيمان بمدأ والتمسكـ به هو أريح وأسلم طريقه لرسم طريق وهدف لنفسكـ وإن كان "التمسكـ بالمبدأ"هو المبدأ الوحيد في حياتكـ...وتعلمت أيضاً أن تعليم المبدأ أسهل وأفضل من تعلمه "أصلك هتوجع دماغكـ ليه أدخل على الطالب ولا اللي عايز تعلمه بنظرة ثقة وقول له يا ابني انا عندي مبدأ وهو هيعجب بيك علطول وهيصدقكـ .. آه والله أسئل مجرب " لعدة أسباب لن أذكرها ولكن سأذكر الأسباب التي جعلتني أخترع هذه الفرضيه وأضمها إلي كتاب الفرضيات الخاص بي

"الحالة الأولى "

الدكتورة بنظرة ثقة " عايزة اقولكم على حاجه أهم حاجه في الإنسان الإنضباط بمواعيدة ...يعني أنا لو حد جه أتقدم في وظيفه عندي اكيد هاخد المظبوط في مواعيدة .. والوصول في الموعد دا بيجي عن طريق التخطيط وقياس حجم الطريق و...... "ورغي كتير أصلها رغايه""

وبعدها بيومين

الطلبه :إيه دا هي الدكتورة اتأخرت نص ساعه يبقى اكيد مش جايه يللا ناخد الأتند"الحضور" وننزل "بنزيط في الزيطه" :) .....ولكن للأسف تأتي الدكتورة بنظرة عتاب ...وتقول " يا جماعه النص ساعه دي ممكن اكون اتكعبلت فيها ولا حصل لي اي حاجه" !؟

وللأسف شكل الدكتورة بقت تتكعبل في كل مره بتكون جيه فيها عندنا ...وشكلها الشهر دا اتكعبلت من على السطوح وجايه لنا الجمعه كعبله حيث أنها لم تأتي ولا يوم في هذا الشهر

ملاحظة "المرأة التي تأتي في الميعاد مرأه مسترجله" من كتاب قالوا لأنيس منصور

"الحالة التانيه"

دكتورة بردو

بنفس نظرة الثقه "أنا لما بصحح الورقه مش ببص في الأسم ..... علشان انا لو طالب بحبه اكيد هفضله على الاخرين ..لازم الانسان يفصل مشاعره عن اي حااجه تانيه علشان ميظلمش الناس "!؟ كلام عين العقل وميه ميه...بس شوفوا مقلب الحرميه"لضبط السجع لا أكثر"!؟

في آخر النصف الدراسي الاول ...لقد نجح وبدرجات عاليه كل من كانت تحبه تلك الدكتورة ولقد سقط من الأعلى كل من كانت تكرهه صدفه مش كدا

"الحالة الأخيرة"

أيوة يا ريم هتقلعي الحجاب ؟! يا بنتي اتجننتي انت لبساه علشان محمود ماشي بس مش تقلعيه علشان توتي يابنتي حرام بجد حتى لو سبتي محمود فقولي في نفسك علشانك يارب انا مش هقلعه حتى لو مش بحبه و..... كلام كتير

بعدها بكام يوم

انا ناويه افكـ الحجاب في الفرح وشهر العسل وبعد كدا هلبسه تاني

نو كومينت

وفي حالات أكتر من كدا ... بس عايزة اعرف حاجه ليه بنحاول نكون غير نفسنا .. ليه عايزين يكون اللي قدامنا يعمل كل حاجه صح ونقف له على الواحد واحنا اصلا من جوه فاضين ..ليه مش عايزين نقبل بنفسنا وباللي حوالينا ..وليه مدام مش عندك مبدأ عايز تعلمه للي حواليك ووبتحاسبه عليه

مفيش احسن من انك تكون نفسكـ وتتمسك بمبدأ أنكـ تكون نفسك وتكون لنفسك سلوك وطرق ترسمها بإيدك ومش مشكله لو غلط الأخطاء هي اللي بتكون الصح

كان نفسي اقول حاله كمان بس مقرفه شويه فخوفا على الصحه مقلتهاش :(

وموعدنا مع الفرضيه العبقريه من كتاب الفرضيات بتاعي "إللي في أول الباص بيوصل قبل اللي في آخر الباص"!؟

ودمتم آمنين من الناس الشرريرين