أولا : سوري على تأخيري على الرد ..بس كابل التليفون بتاع المنطقة كلها كان واقع ...مصر دي امي
المهم ..اول يوم في الجامعه "بالنسبه لي " كان بعد ما الجامعه بدأت بأسبوع... ركبت الباص وانا مخضوضه ... سألني السائق...إنتي ركبتي امبارح؟؟...بصيت له ورديت عليه رد مش عارفه ايه علاقته بالموضوع...قلت له لا أصل أنا تانيه...تبعا هو مش فهم حاجه ولا انا فهمت حاجه...كل اللي فهمته ان حسيت بإحتلال في الباص ...كلهم اولى ..أمال فين اصحابي ...قعدت ادقق في كل وش اشوفه ...وأخير شفت وشوش اعرفها ,,, الحمد لله,,,الباص لسه بخير ...سلمنا سلام حار ..وقعدنا نحكي وندردش لحد ما وصلنا الجامعه ..إيه دا ...الجامعه نضفت كدا ليه ...اكيد بتعمل منظر قدام الطلاب الجديد ...منا عرفاهم ...المهم بصيت للبنات والشباب بتوع اعلام ..ماشاء الله وشوش جميله "مش كلها" وبدأت أشوف رقة البنات وظرف الشباب ..إللي انا عارفه ومتأكده انه هيختفي اخر الترم مش السنه كمان ...وظهر في دماغي سؤال...ليه دايما البنات والشباب بيدوروا عن الحب في اول السنه؟؟؟ليه كلهم بيدخلوا وعنيهم على بعض وبيحاولوا يلاقوا لنفسهم الشريك المناسب ...أنا مش بعمم ...بس المعظم كدا ...أنا فاكره السنه اللي فاتت في ناس كتير ارتبطوا بعد اول اسبوع ..وأنا كل ما اسمع كدا أقول :هاه ..نعم...مين...اشمعنى...وبردو مش بفهم....هل يا ترى لأن احنا دايما بنشوف في المسلسلات ان الحب لازم يحصل في الجامعه؟؟أو ان في بنات بتفتكر انها لو مش طلعت بعريس من الجامعه هتعنس ؟؟!! اللي بجد مش قادره اصدقه انهم مش مستوعبين انهم هيفضل سنهم صغير لحد ما يتخرجوا من الجامعه ...يعني يمكن يتخرجو وهما 20 او 21 او بكتيره 22 وده بيكون اول سلم في سن النضج...ولذلك انا حابه اعمل بحث عن الموضوع ده...وهسأل اخصاء نفسيين...وهسأل على قد ما اقدر كل واحد وواحده ...ليه رحلة البحث عن الحب بتبدأ من الجامعه؟؟ هل ده علشان بيكون احتياج لإستقرار مؤقت او تسليه وقت او امان اكتر او منزره قدام الزملاء ...ولا ايه ..وهل وهما داخلين في العلاقه دي واخدنها بمحمل جديه ولا لسه مش خططوا للمستقل ومستنين بكره ؟؟!!!ياريت اي حد يدخل يقول رأيه في الموضوع ده ....
وانا شخصياً شايفه السبب في الموضوع ده هو البحث عن الاستقرار المؤقت...لأن ناس كتير مش بيحسوا بالإستقرار الا بالحب...انا مش اعتراضي على الحب في الجامعه..أصل الحب محدش بيقدر يأجله أو يقول انا لسه صغير...الحب ملوش وقت ولا له سن...أنا اعتراضي على اصطياد الحب...يعني في بنت معايا في الكليه كانت اول السنه هتموت وتحب,,وتلاقيها كاتبه على كل حيطه في الجامعه اسمها+؟=حب...وعلى آخر السنه فعلا ارتبطت بواحد مش عارفه هو مين بس اللي عرفته انها حبت واحد وسابته السنه دي باين...وكل اللي حب السنه اللي فاتت ...فركش السنه دي...يمكن ده لأننا جيل مستعجل بيكره الانتظار...أو جيل بيجري ورى الرغبه...او يمكن جيل تعبان وبيحب يروح عن نفسه...أنا مش بتكلم على الجيل كأني مش منه...أنا من الجيل دهـ...بس أنا مؤمنه بقدري وسايبه العواطف لوقتها...أو يمكن لأن فيه في حياتي حاجات كتير مخلياني مش بفكر في الارتباط العاطفي...بس بجد انا شايفه بنات كتير بتقع في ارتباطات بس علشان مش بتحب تكون مش مرتبطه...ويمكن بنلاحظ ده بأن بقى في بنات صغيره في السن ومتجوزه...انا اقصد صغيره في السن بأنها لسه بتدرس.. كل واحد حر...بس انا اقصد ان الموضوع ده كان بالنسبه للناس من كام سنه انه تخلف...
أنا مش معترضه أنا بس بحاول افهم
هناك ٥ تعليقات:
صعيدى و افتخر: انساك دا كلام على راى الست ثومة عموما و الله هية ظروف نفسية وربنا يعدلها عموما موضوع حلو قوى و انا عن نفسى لما دخلت الجامعة شلت قلبى فى البيت لان الحب مسؤلية و ومعظم اللى فى الجامعة مش قدها نظرا للظروف المادية للبلد اما بقى رد على البوست بتاعك يا باتريسيا اقولك ان فى مصر اول تجمع للشباب و البنات بيبقى فى الجامعة على نطاق واسع بصرف النظر عن المدارس المختلطة فكل واحد يطلع كبت كان جواة من ناحية البنات و فعلا كل واحد يحس انة محتاج يطلع احاسيس جواة مش عارف باى حق و على اى اساسا صحيح فى ناس اصحابى حبو بعض فى الجامعة و اتربطو بعدها بس نسبة ضئيلة النسبة دى اللى بتقول لكل واحد من جواة لية مش ابقى زيهم عموما ربنا يوفق الناس لكل اللى بيحبوة و يارب ما تحرم حد من حبيبة
كلامك صح من ناحية موضوع انه اول تجمع للشباب والبنات بنطاق واسع...بس اصل الايام دي بقت الصحوبيه شئ عادي و"كول" واللي مش مصاحب او مش بيصاحب يبقى حاجه غريبه...ناو بقى معظم الشباب بيفكر طول الوقت في الصحوبيه وانه لازم يصاحب ولازم يحب و اذا محصلش كدا بيفضل مكتئب...أنا مش بقول كدا من فراغ انا بقول كدا استناد على فئات شفتها في الجامعه...طولت عليك...بس اصل الموضوع ده كنت عايزه اكتب عنه في مجلة الجامعه وغيرت رأي...رحت لأتجاهـ تاني :D
أنا أقولك يا ستي بحكم الخبرة القليلة اللي عندي واستشارتي من بعض أصدقائي في تلك المواضيع
وأيضاً بحكم إني كما أنت تفعلين أتركه حينما يأتي ولكنني لا أتركه جانباً وأنسى
الموضوع يرتبط بأن في الجماعة إلى حد كبير تتكشف الحقائق وتظهر أمام الجميع إلى حد كبير برغم الاسطناع المعهود في تلك المرحلة الأخيرة من الحياة الدراسية المملة والشاقة والتي غالباً يعتبرها البعض بابه على الحياة والبعض يجعل منها حياته بذاتها والبعض لا يعيش فيها بالمرة والبعض الآخر يترك الأمور لأوسطها وهناك أكثر من "بعض" في هذا الأمر
ولكن الفكر تنحصر في أنهم يرون بعضهم يومياً تقريباً ويتطلعون إلى تكوين "الصداقة" على حد زعمهم والتي هي يريدونها حباً أو كلمة من حرفين فقط وليست مشاعر صادقة فالحب هو الذي يأتي ولا نذهب له مهما تأخر حتماً لأنه يزور "بعضاً" آخر ليبهجه
أرجو أن يكون كلامي واضحاً ومع أطيب التمنيات بالنجاح
قصدي بالنجاح في الدنيا والآخرة برضه والدراسة كمان ورحلة البحث عن الحب دي
شكراً وعذراً للإطالة
صعيدى و افتخر : معلش تانى بوست ليا بس الواحد فاضى اليومين دول بقينا عاطلين و الحمد لله يا باتريسا الصداقة مش عيب المشكلة فينا احنا اننا بنقلب التعدو الى حب اتعودت اقعد مع فلانة كل يوم و اشوفها كل يوم بقت جزء من حياتى يبقى انا بحبها ماعدش فى صداقة لمجرد الصداقة الا بسيط و الله هانبقى زى الفل بس لوكل واحد بطل يفكر فى نفسة و ربنا ما يحرم حد من حبيبة يا رب دا الحب نعمة بس اللى يصونها و مش يلعب بيها سلامى ليكى يا باتى
الأستاذ
أنا كنت اقصد بالصحوبيه يعني " boy friend and girl friend
يعني تكوين "كابل"زي ما بيقولوا ...فعلا ممكن زي ما بتقول انهم بيشوفوا بعض كل يوم بس انا بقول ان في ناس بيرطبتوا بعد اول اسبوع ومن غير مبالغه ... ولا اطاله ولا حاجه اكتب براحتك
-----------
صعيدي وافتخر
انا مش بعترض على اللي بيحبوا بعض في الجامعه ...أنا بس بقول على اللي بيقعدوا يدوروا على الحب ...ويتنقلب حياتهم لو مش لقوا الحب دهـ ...أما الصداقه البريئه بقت نادره اوي فعلا...ربنا معاك يارب ...ومتخفش...ربنا مش بيسيب حد وكل واحد بياخد نصيبه
إرسال تعليق