دايما بحس ان الاطفال دماغ كبيره اوي بس بيستعبتوا...وانهم بيكونوا واعيين لكل حاجه بس علشان خبرتهم قليله مش بيكونوا فاهمين....وعلشان كدا بدأت أسأل أخويا عن حاجات كتير وأشوف رأيه...لأن في البرامج الاجنبيه بتلاقي الطفل 5 سنين وبيتكلم وبيعبر عن رأيه...بعكس عندنا هنا في مجتمعنا امصري مش بتلاقي الاطفال بيعرفوا يعبروا عن نفسهم ...يمكن لأننا مش بنديهم ثقه بنفسهم..فبيحسوا ان اي حاجه ممكن يقولوها حد هيضحك عليهم ...فبيفضلوا الصمت...المهم قررت اني اسأل اخويا الصغير عنده 9 سنين عن مواضيع جديه واشوف رأيه فيها...واهم حاجه عملتها اني سمعته للآخر وكتمت الضحكه وعملت كأني بجد مهتمه بكلامه وحصل التالي
في البدايه ارحب بيك واحب اسئلك شوية اسئله
ايه رايك في الحب؟؟
الحب جميل..كويس اوي
تيب يعني ايه حب؟؟لما حد يقولك انا بحب تعرف انه حاسس بايه؟؟
انه بيحبك اوي يعني عايز يفضل معاك علطول
وايه تاني؟؟
يعني بيحبك يعني بيعمل اي حاجه انت عايزها
وبردو مش يتخانق معاك ولا يزعلك؟؟
في الاول لا بس بعد كدا بيتعودوا
بيتعودوا على ايه ؟؟
على الخناقه
يعني عارفين هو هيقول ايه وكدا
تيب ...عمرك حبيت؟؟
لا
ليه؟؟
علشان لسه صغير
يعني ايه لسه صغير؟؟امال امتى المفرود تحب؟؟
لما اوصل الكليه
يعني قبل كدا مش المفروض تحب؟؟
لا
ايه صفات فتاة احلامك؟؟
ذكيه..أمورة
تيب ايه مواصفتها كشكل؟؟
قلت امورة
تيب مواصفتها ايه ...عنيها زرقه خضرا كدا؟؟
عينيها غامقه...شعرها اصفر"يقرمش الشيبسي ويكمل حديثه" ...ويكون كلامها حلو يعني ومحجبه
تيب لو مش محجبه مش هتحبها؟؟
لا هحبها بس هقول لها تتحجب
تيب ايه الصفه اللي لو لقتها في حد تحبه؟؟
بيساعد الناس ..يكون طيب"يقرمش الشيبسي"...ذكي
تيب انت شايف نفسك طيب؟؟
والله معرفش على حسب الناس رأيهم ايه
تيب ايه اكتر صفه بتشوفها في الناس كتير وانت مش بتحبها؟؟
مثلا بيكذبوا او بيقولوا كلام محصلش والغش
تيب انت لو حد اتهمك ظلم هتعمل ايه؟؟
والله انا هحاول ابراء نفسي على قد ما اقدر ولو مقدرتش ....معرفش هعمل ايه
تيب لو حصل مشكله مع مراتك هتعمل ايه؟؟
هكلمها بهدوء حتى لو هي بتزعق"يقرمش الشيبسي بسرعه"...هحاول اهديها يعني اوضح اني زعلان شويه واطلع بره اجيب لها حاجه هي بتحبها وارجعلها..هتلاقيها هديت علطول علطوول
تيب وايه رايك في خاتم الالماس؟؟
اه حلو اوي
ناوي تجيب لمراتك واحد؟؟
هجيب لها دهب
والماس لا؟؟
لا هجيب لها الماس ودهب كتير اوي
ليه عايز تجيب لها الماس ودهب؟؟
عادي يعني
علشان بتحبها؟؟
أه
ايه رقمك المفضل؟؟
5
اشمعنى اخترت الرقم دا؟؟
علشان بيفصل بين الحاجات ...يعني لو في عمليه حسابيه كبيره تقدري تعدي بالخمسه
تيب وايه رايك في الرقم 13؟؟
معتقدش انه حلو علشان يعني لوعمليه حسابيه تبدأ ب 13 وحاجه تانيه مش هتعرفي تحسبي
ههههههههههههه متعقد من الماث يا عيني...كلامي معاه حسسني فعلا اننا ممكن نفتكر ان الاطفال دول "اطفال" مش فهمين حاجه ولا ليهم رأي ولا أي حاجه...علشان كدا ما بيصدقوا ويكبروا ويبدأوا يثبتوا للي أكبر منهم انهم مش اطفال
هناك ١٤ تعليقًا:
ههههههههههه
الواد ده عسل يابنتي واجاباته مسخره
واضح ان الشيبسي كان رشوه علشان يقعد يعمل الحوار ده
:) بس ايه الافكار دي؟
فكره جميله بجد يا باتريسيا
وفيه اجابات بتطلع بطلقائيه بسيطه وفي نفس الوقت مباشره
تحياتي وسيبي الولد ماتعمليش منه حقل لتجاربك:)
هههههههههههههه
يعني تقدر تقول اني خليته على راحته :D
هحاول اسيبه احسن هو اتعقد وكل ما اقوله تعالى اتكلم معاك يقولي "لقاء لا" هههههههه
هههههههههههههههه
عسوول اوى
وحلو الرشوة دى ..
عايز من ده
وماله رقم 13 ماهو حلو وزى الفل
يكفيه ان عمو السفاح جه فى اليوم ده
صعيدى و افتخر : بجد بجد ربنا يخلهولك يا رب احساسة حلو اوى و تفكيرة منطقى جدا بس لسة تاثير البيئة المحيطة متاثر علية زى ما اثر علينا عقبال اما تشوفية فى المكانة الى هو يحبها و سلميلى علية قوى قوى و قوليلو فى واحد عاوز يتكلم معاك و يجبلك كرتونة شيبسى بحالها هههههههههههههههههههههههههههه
تحياتى
ههههههههههههههههههههههههههه
حاجه حلوة اوى وفكره جميييييييله
لذيذ جدا الولد و يا ريت تعملى معاه كام حوار و تتحفينا بيهم
looool .... wALLAHi 2a5ooky da sokara :D
2a5er 7aga 2alha de 3agabetny 2wy esra7a .... howa sa7ee7 tafkero baseet ..bs wade7 elm3alem y3ni :D
PS: (elm3alem) de kelma kbeera shwya ...bs mala2etsh 3`erha :D
عثل اوى على فكرة
انا عايزة حتة شيبسى
:)
والله إجاباته زى العسل .. ربنا يخليهولك .. ويقدرنا إننا نفهم عقلية اولادنا واخواتنا .. عشان هما دول جيل المستقبل . مش قصدى الجمعية المعروفة طبعا
بجد حوار ظريف وماشاء الله الطفل دمه خفيق واجاباته كمان اظاهر السر في الشيبسي ربنا يخليهولك
هههههههه دا كميل خالص و كيس الشيبسى دا مبيخلصش
انتة فين بقالك كتير مش ظاهرة عاوزين بوستات جديدة
عسل اوي ربنا يخليهولك
وبصراحه فكره جامده فكرة الشيبسي
ما شاء الله بجد يا باتريسيا
الولد ذكي بجد ما شاء الله
وعلى فكرة اجاباته احسن مني مليون مرة وانا اكبر منه كمان واتسئلت نفس الأسئلة
ربنا يحميه ويبارك فيه
وفعلا احنا بنظلم الاطفال رغم ان احنا يوما ما كنا أطفال
تحياتي لك من ماناساس البلد
احلى حاجه فى الاطفال واللى بتخلنى عايزه ارجع طفله ان البراءه والصدق والنقاء فيهم نفسى يفضلو كده من غير ماحاجه تلوثهم من الحقد .. موضعك انهم ليهم رايهم اللى لازم نقدره ونحترمه
ده اكيد هو ده رايهم اللى بتحث عليه فطرتهم الجميله ..
وسلمى على اخوكى العسل ويارب رايه دهيكون لحد الاخر
إرسال تعليق