مترو الانفاق...هدية مبارك للشعب

مترو الأنفاق

تبعا مش دا ...دا مترو في ملاهي مش عندنا في مصر انا اقصد دا

حتى دا مش هو ...الأرض بتلمع اوي ...ولا كأن 5 مليون داسوا عليها...ما علينا...اخويا الصغير كل ما يشوفني يقعد يقولي"عايذ اروح المترو" من السنه اللي فاتت ونفسه يركب المترو ....قلت له يا سلام عيوني بث كدا ....ورحت وخداه انا واختي وجايبين 3 تذاكر من الغالي ...تبعا اصلي مش بركب درجه تانيه بركب درجه اولى اللي هي العربيه اللي ورا السواق علتول....المهم ركبنا الصبح على 9 ونص كدا علشان الزحمه ...يادوب اخويا حط التذكره من هنا وراح معدي من البوابه اللي جمبها ..."يا ابني يا حبيبي ...بقى تحط التذكره في البوابه دي وتعدي في اللي جمبها ...حاطتها للجيران يعني"دا انا ايوة والله دا صوتي ...المهم اخدته من ايده وعديته ...تبعا هو كان فرحان اوي بالنسبه له "أدفنشر" هيروح يحكيها لأثحابه ....المهم طول ما انا رايحه المترو عماله اقوله "خلي بالك من محفظتك ومن موبايلك" ...هو سمع الكلمتين دول ومسك فيا ومشي وهو ماسك على جيبه ..كأنه بيقول للناس انا معايا حاجه خايف احسن تتسرق ...رحت بصت له قلت له لا مش كدا ...قالي "تيب خلاث خديه انتي ونبي ونبي" ...تيب هاتهم ...جه المترو ....لقيته بيجري على جوه وهو خايف احسن الباب يقفل عليه...وياسلام على السعاده ..وكل ما اقوله تعالى اقعد يقولي لا انا عايز اقف...ومن ساعتها وهو بقى بيحب المترو والمترو بيحبه...وبقى اي مشوار اقوله تعالى معايا ...يسألني "هنروح المترو"؟؟

----------------------

عندي واحده صاحبتي نص مصري نص ياباني بس أول سنه تعيش في مصر...بنت عسل من الاخر ...بتمشي ومعاها

nootebook

صغير فبفتحه من الاخر ...لقيت خريطه صغيره بالياباني ...بسألها ايه دا ؟؟ قالت لي خريطه للسب وايز اللي عندنا ؟؟؟ يا جمال اليابان ...خريطه للمترو اللي عندهم ؟؟؟دحنا بنمشي ببركه دعاء والوالدين ودعاء الناس اللي واقفين علشان نفسهم حد ينزل من العربيه اللي الكل بيكون واقف فيها فوق رجلين بعضه...المهم سألتها إلا صحيح ركبتي المترو اللي هنا ؟؟قالت لي نفسي اركبه ومحدش راضي يعرفني ازاي اركبه ...هي فكره بقى ان عندنا خريطه زي اللي عندهم في اليابان ...قلتها يا سلام بس كدا ..تعالي في يوم نتفق انا وانت نتقابل عند اقرب مترو عندك واركبهولك ...بس انتي تعرفي حد يفهم في المترو ؟؟ لا ...ابتسمت كدا وقلت في نفسي "يافرحتي...أصلي انا حافظة كام محطه في المترو الجديد اما المترو القديم انا مش ركبته غير مره واصحابي كانوا محفظني انزل فين" قلت لها اها اصل انا مش بفهم في المترو بتاعكم ..بصي ممكن اخدك جوه افرجك على الخريطه اللي جوه واعرفك ازاي تمشي فيه ونرجع تاني علشان انا مش عارفه شوارع مصر اوي ...بصت لي كدا قالت لي هو انتوا الخريطه بتكون جوه المترو ؟؟...قلت لها امال ايه ...قالت لي في بالانجلش ...قلت لها تبعا ...مصر دي امي ...المهم لحد ناو مش ودتها مترو :(

كان نفسي اشوف تعبيرها عنه !!وهل زي ماهي بتشوفه في اليابان ولا لا ...يللا فرصة تانيه