باص المدرسه

فاكره اول يوم في 3 ثانوي زي امبارح ...الدنيا حر ميعاد ركوب الباص .. رقم 3 ..تلعت اجري عليه علشان المكيف واهه اقعد لوحدي في اول يوم دراسي وناس جديده واصحابي القدام محدش فيهم معايا في الباص ... اخدت تاني كرسيين وقعدت عليهم وسندت على الشباكـ ,,,حتيت جنبي الشنته علشان محدش يقعد جنبي ... بصيت على سواق الباص "عم محمد" شكله في اواخر العشرينات او اوائل الثلاثينات ...مصري الجنسيه ..لازم لما يركب يظبت المرايا علينا ورا ... وقلت في نفسي "يوووه هو انت لسه هنا " ... تنشطه وقعدت افكر في اختي والثانوي والجامعه والمدرسه والمدرسات ...كان يوم كئيب فعلا ...شويه ولقيت اتنين داخلين واحده رفيعه وطويله "سودانيه "مع اني كنت فكراها سعوديه ..والتانيه بيضه وجميله الملامح "سوريه" ...دخلو وقعدوا ورايا بالظبت ...ساعتها شلت الشنته وممدت على الكنبه ...قعدت اسمعهم وهما عمالين يضحكوا ويتريقوا على السواق وهو عمال يبص لهم ...وفضلوا يعلقوا تعليقات كنت بضحك عليها وانا نايمه... بعد ما الكل ركب والباص اتحرك لقيت البنت السودانيه قامت ومالت عليا وهزتني وقالت لي مالك ؟؟؟ ....قلت لها ابدا حرانه اوي فقلت انام ... قالت لي احسن حاجه عملتيها ...ومر اسبوع ... وانا بقعد تاني كرسي لوحدي ومش عايزة اتعرف على حد وكنت بحاول اكره اي حد فيا يمكن لأني كنت كارهه نفسي الفتره دي...وفي يوم لقيت البنت السوريه بتنده لي وتقولي تعالي اقعدي معانا على الكنبه ورا ... وبدأنا التعارف انا فلانه في فصل كذا وانا فلانه في فصل كذا ودي فلانه في فصل كذا ..وبدأت علاقتنا ...وكان في بنتين قاعدين قريب مننا وسامعين كلامنا وضحكنا و مكنش عاجبهم الحال ... إزاي نضحكـ وفي راجل مش محرم ؟! ..وابتدت الشكاوي علينا والخلافات بينا وبين البنتين دول ...الحقيقه هي كانت واحده فيهم بس مكنتش عارفه ساعتها انها واحده اللي كانت بتشتكي....بعد ما غيرت فصلي ...ورحت فصل تاني ...طلعوا البنتين دول معايا في الفصل...قربنا من بعض ...وإستغربوا انا كنت ليه مش بكلم حد في الفصل وبقعد ادحك في الباص!!!وقربنا من بعض وبقينا بنقضي احلى ايام فيه ..ضحك متواصل .... كنا نكون متنكدين من الامتحانات ...نتلع نجري على الباص علشان نهزر ونتكلم في اي حاجه غير الدراسه ...كنا 5 بنات مصريين و2 سودانين و1 سوريه و1 سعوديه ...ومرت الايام ومات والد البنت السعوديه كانت في منتهى الطيبه والبراءه اللي في الدنيا ومش قادره انسى ضحكتها ونظرة عنيها واضطرت انها تقعد من المدرسه في التيرم التاني ومشيت بنت مصريه وبقينا الباقي اصحاب اوي ...كانوا بنات زي العسل...وكان الباص بتعنا الكل نفسه يركبه ولو يوم علشان يقعد معانا فيه ....يااااه وحشوني اوي بجد كلهم ...كانت ايام لا تنسى ...دلوقتي اتفرقنا وكل واحدة راحت بلدها ومبقتش على علاقه غير باتنين ...الباص كان احلى حاجه في 3 ثانوي وكان بيهون عليا كتير...كتير كنت اقعد وافتكر قعدتنا سوا و احتلالنا لآخر صفين في الباص...وخناقتنا مع عم محمد لو مكنش عايز يستنى حد فينا ...سبحان الله كل ما افتكر البدايه وخناقتنا مع البنتين دول وإن ناو البنتين دول هما ال2 اللي بتصل بيهم ...أقول سبحان مغير الأحوال ...بجد محدش عارف بكره مخبي ايه...3 ثانوي بالرغم من اني تعبت فيها كتير وسنه وحشه في حياتي وكنت كارهه نفسي فيها...إلا إني كل ما افتكر اايام الباص اتمنى انها ترجع تاني ...ايه اللي فكرني ب3 ثانوي والباص مش عارفه ...الواحد عجز باين وبيفتكر الايام الحلوة في حياته :D