ليه ناكل عيش ؟؟ ماممكن ناكل مكرونه !!!

إحذروا من تهريب رغيف العيش في بورسعيد ... يعني اي واحد هيخرج من محافظة بورسعيد ومعاه عيش مدعم هيتصادر منه فوراً .... " كشفناكم يا حلوين " ...يعني اي واحد يستنصح ويروح يشتري من العيش المدعم اللي هناك هيتصادر منه قبل ما يرجع على محافظته .... وأنصح اي مواطن اللي اكيد مش هيكون معاه فلوس حتى علشان يقرأ الكلام ده ... إنه ياخد عائلته ويشتروا العيش ويكلوه داخل حدود محافظة بورسعيد .. وياسلام بقى لو يعرفوا يدخلوا الحمام علشان يداروا آثار الجريمة !!! :) لحسن يكشفوا عليهم ويصادروهم ولا حاجه





يعني عليكم يا شباب مصر .... لأني للأسف بدرس fun. of reporting 2 فلازم انا وشلتنا الكريمة نقرأ جرايد الاسبوع ونلخصها ونترجمها ونغسلها وننشرها وفي اخر يوم نستتها وندفيها بتحمير البطاطس عليها ... ما علينا ... المهم ... فالدكتورة بتقعد تحكي لنا عن العيش المدعم لأن دي القضية الاساسيه والأوليه اللي كل الجرايد بتحكي وتتحاكى عليها ... وفي وسط حديثنا قلنا ان قدام العيش المدعم مش هيبقى موجود بسبب اتفاقيات القمح اللي الست امريكا بتعملها مع ماما مصر ... وردت بنت خنيقة جدا كانت قاعده قدامي الحقيقه وقالت بالنص " وليه يشتروا من العيش ده ... ما يشتروا من العيش اللي بنشتريه

50piaster isn't that much"

طبعا انا ايدي كانت هتتمد على اقرب حاجه ممكن اطولها منها ولولا اصحابي لحقوني كان زماني في القسم ... طيب الموضوع عدى والدكتور قعدت تشرح للبنت ظروف الناس ... اللي زاد وغطى بقى بنت تانيه أصل احنا معظم دفعتنا بنات :) قالت للدكتور طيب وليه مش ياكلوا عيش السن ... قالت لها طيب وده مصنوع من ايه ؟؟؟ قالت لها القمح بس معظمة رده .... على اساس ان الرده دي بتيجي من قشر الموز ... وتطوع واحد امور فرفور وقال ... وليه ياكلوا عيش ؟؟طيب ما ياكلوا مكرونه .... هو قال الجملة دي وغطى سكون على المنطقه :) وبعدها غطى صوت قهقهه من كل انحاء الكلاس :)

صحيح يا جماعه احنا ليه محبكنها وعمالين نقول عيش مدعم عيش مدعم ... مهو عندنا عيش سن وعيش بالرده وعيش ابيض ريتش بيك موفره لنا ... ربنا يخليهم .... وبعدين في مكرونه بالصلصه الحمره والصلصه البيضة مع المشروم والفراخ ... أو بالجمبري مع الجرين صوص .... دي مصر كلها خيرات وكفايه بقى كلام عن العيش والمكرونه احسن جعت